政情：沙田區會為拗粒字 叫民政助理專員問老師
沙田區議會地區設施管理及保安事務委員會尋日開會，有區議員就同民政事務助理專員（ADO）因工作小組職權範圍嘅字眼起爭拗，區議員楊思健更批評ADO對中文嘅理解，甚至建議佢請教曾任教中文嘅沙田區議會主席程張迎。
爭論職權範圍字眼定義
話說喺討論建議成立地區設施及改善工程工作小組時，有區議員建議職權範圍應包括收集居民對社區治安及紀律部隊執法的意見，並向有關部門提供意見，以作出跟進及協助、檢視及建議於區內設立表達公民權利的設施。
ADO黃添培話，根據《區議會條例》，區議會職能係向政府提供意見，認為職權範圍內如果有實質跟進行動，係超出區議會職權嘅範圍，所以「以作出跟進及協助」，字眼上有機會係額外嘅跟進行動，仲話區議員以個人名義去協助街坊同有跟進行動，亦有現行機制協助，認為職能有重疊。
但隨即惹起多名區議員炮轟，李志宏直斥黃係邏輯有問題，仲話黃係九優狀元，反映香港教育失敗；而黎梓恩提到過往去信政府部門跟進時，相關信件都包含區議會標誌，再加上過往喺區議會會見市民計劃上有同區議會秘書處一齊跟進個案，質疑係咪違反條例，並反問「係咪要告我，要告埋秘書處呢？」