政情：鄭若驊不務正業 派罩當政績

多案積壓 議員：好得閒無嘢做？

鄭若驊自二○一八年出任律政司司長，兩年以嚟一直醜聞纏身，民望長期「墊司底」兼被嘲為「避政司司長」，唔單止喺履新首日就爆出僭建事件，其後又被揭發未有申報丈夫潘樂陶喺佢任內持有兩個合共逾億元嘅物業，而舊年十一月佢喺英國倫敦更被反修例示威者包圍，混亂中狼狽仆倒街頭。

不過，即使鄭若驊返港休養後復工至今，仍然不事生產，未有做好律政司司長嘅職務。唔知係咪因為自知民望太低，佢高調發網綕宣傳自己到社區做義工，向有需要家庭派發防疫物資，期望能藉抗疫戰「抽水」去到幫自己賺取分數？

勞工界議員何啟明反問鄭「好得閒無嘢做？」又指明白市民急需口罩呢啲防疫物資，但強調唔應該係由律政司司長去派。佢話市民期望律政司做好檢控工作，並指現時仍有大量與反修例風波相關嘅案件一直積壓喺度，指出鄭若果有時間應加緊督促下屬，甚至落手做埋一份，再檢查清楚啲法律文件避免再次出錯。

何啟明將律政司司長嘅角色比喻為醫生，指醫生喺緊急情況下會選擇運用好自己嘅專業知識去救助病人，而唔係做啲乜嘢人都做得嘅派口罩，強調鄭係擁有法律背景嘅政府官員中最高級嘅一位，批評鄭作為律政司司長落區派口罩係「九唔搭八」。

學者：掛住做政治騷 本末倒置

香港理工大學專業及持續教育學院講師陳偉強亦指工作有輕重之分，而律政司工作繁重，就應該做好法治同檢控工作，冇需要做派口罩呢啲政治騷，批評鄭嘅做法係本末倒置。佢又形容鄭打算藉住派口罩嚟炫耀自己嘅政績，只會令人得啖笑，畀市民覺得不務正業嘅感覺。

陳偉強又解釋，指政府並非唔使做防疫嘅宣傳工作，但各部門應有分工，例如由民政事務局或勞工及福利局局長去做，認為咁樣對市民嘅關心較貼切，但由律政司司長去做並唔適合，重申律政司應做好法治及檢控工作，而非不務正業，本末倒置，只顧做政治騷。