中環出更：正向抗疫 黃偉鴻郊遊煮飯仔
疫情不斷擴散，依家市民少咗出街，人多聚集嘅地方亦可免則免。日日留喺屋企悶到發慌喎，搞到情緒低落添！其實，仲有好多嘢可以做嘅，例如行山、做運動同食住家飯喇，有益身心呀！
防疫，就要勤洗手、戴口罩。好似香港中華廠商聯合會會董黃偉鴻（Ellis）早前亦有四出撲口罩，仲將其中一萬五千個送咗畀前線醫護人員添！講到自己防疫，Ellis就選擇郊遊。佢早前喺Facebook（Fb）上載咗幾張相，貼文話行完八仙嶺未夠喉，跟住再行流水響水塘，再轉鶴藪水塘，去到鶴藪郊野公園，見到有個婆婆擺地攤賣本地種嘅蔬菜，佢又憐惜婆婆耕田耕到腰都彎埋，於是幫襯買咗羅馬生菜、黃薑同本地冬蜜。
楊偉誠同太太撐枱腳
Ellis話呢排唔好去人多擠迫嘅地方，而郊外人少空曠，空氣又清新，仲可以順便買餸返屋企煮飯食。佢話依家多啲留喺屋企，梗係多咗食住家飯喇，有日仲煮自家秘製嘅冬菇鱆魚肉餅煲仔飯添！
講開美食，香港藝術發展局副主席楊偉誠（Frankie）同太太、資深歌手張德蘭早前亦去咗一間餐廳食飯，Frankie仲重點推介燒春雞，話係用新鮮元朗恩州雞烹調，肉汁豐厚，皮脆肉嫩，好有口感，而雞肉亦醃得恰到好處，仲話係佢食過最好嘅燒春雞喎，佢仲話好享受同太太撐枱腳，以正面嘅心態，燒春雞同美酒抗疫。
運動亦係抗疫嘅正面態度。有啲網友見到香港藥學會會長龐愛蘭（Scarlett）做運動嗰個樣，即刻起哄。點解？同Scarlett喺Fb上載嗰段短片有關，有網友話：「穿旗袍做運動，我都係第一次見到。厲害。」而Scarlett回覆話：「咁你就冇藉口唔做運動喇！」佢話喺屋企經常做運動同清潔家居，嚟增強免疫力。
卓妮