政情：公民講場：基建超支延誤多籮籮 黃偉綸推資訊科技幫拖

政府工程項目屢爆超支，之前先公布沙中線工程超支逾百億元，政府被批監管不力，運輸及房屋局局長陳帆實走唔甩受靶。發展局局長黃偉綸就發表網誌，話未來幾年政府每年喺工務工程嘅投資平均達一千億元，為咗減低工程項目超支或延誤嘅情況，今年第二季起會分階段喺所有工務工程項目應用數碼工程監督系統，希望提升施工效率，減少文書工作同減低紀錄出錯風險。財政預算案將撥款一億元開發綜合數碼平台，實現數據整合同資訊互換，令工程人員同部門管理層可即時知道工程進度同表現喎。不過如果政府仲係懶懶閒疏於監管，咁就有幾多系統同平台都冇用喇。