政情：八網難逃：屋企冇嘢好做「瑜伽蔚」玩倒立
最近唔少市民都因為疫情肆虐少咗出街，喺屋企成日流流長又唔知做咩好，就連區議員都好似好得閒冇嘢做咁！南區區議員袁嘉蔚（Tiffany）尋日就喺其個人社交帳戶上載咗一張喺屋企練習倒立嘅照片，雖然佢就自稱自己「唔夠力」，但呢個高難度動作都成功「呃like」。
Tiffany張倒立相唔止見佢露出小蠻腰，仲有手臂紋身圖案。佢一出貼文，就有人即時留言話Tiffany不斷表演高難度動作，亦有人幫佢改咗個中文名諧音花名，叫佢做「瑜伽蔚」，亦都有人留言話佢咁多才多藝，會提高區議員嘅門檻咁話。
屯門區議員李家偉亦都有喺貼文上留言，仲話睇完張相之後感到「有壓力」。Tiffany就話，依家又唔係整文宣，唔使有壓力喎。Tiffany今次「公開練兵」，唔知佢遲啲會唔會喺公開活動或為街坊做才藝表演時再展示功架呢？