政情：冇廁紙辦大事 林超英有絕橋
天文台前台長林超英退休後仍然活躍，日前佢就上咗電台節目談及近日出現嘅搶廁紙情況，仲分享廁紙未曾出現時，如廁之後可以點樣清理添！
憶童年用草紙 先搓軟免刮親
對於早前有唔少市民因為擔心廁紙短缺而爭相搶購，林超英就指廁紙面世只係得四、五十年，而佢童年時家中就並冇廁紙，「辦完大事」就用草紙解決。至於草紙會唔會太過「嚡烚烚」，刮親細嫩嘅肌膚？林就話，用草紙清潔其實有個竅妙，就係使用前先捏成一舊同搓軟張草紙，目的就係要整斷啲纖維，等到用起上嚟可以舒服啲。佢仲提到，因為啲纖維斷咗，張紙仲會好吸水添！
林超英仲講到，自己曾經問過一啲長輩，到底喺連草紙都冇嘅時候係點樣解決，得知原來以前係用樹葉，甚至係樹枝。真係聽到都覺得痛喇！佢仲提到，其實有啲人都諗咗啲無痛方法出嚟嘅，例如可以用水洗，或者「辦完大事」就去沖涼咁話喎。