中環出更：蔣麗芸再撐蒸口罩 網民：放過我啦
新冠肺炎疫情下口罩價格高企，市民怨聲載道。早前議員蔣麗芸（Ann）就喺網絡社交平台發布短片，話既然口罩供應短缺，用高溫蒸氣消毒口罩後重用都不失為一種方法，結果惹嚟網民質疑甚至嘲諷。不過Ann似乎就唔服輸，尋日再度上載短片為蒸口罩論平反，繼續向網民證明蒸口罩可行。有網民大嘆Ann真係鍥而不捨，亦有人話︰「求吓你放過我啦」。
自費逾九千做檢測證可行
Ann喺短片中指出，內地中山大學附屬第三醫院有研究話，將口罩放喺攝氏一百度高溫之下進行十分鐘高溫蒸氣消毒，係唔會損害口罩結構，又話內地及台灣都有研究指乾蒸口罩五次，每次三分鐘，口罩嘅耐力都只係減少百分之七點五。唔止用兩地研究力證蒸口罩唔損害口罩結構，Ann佢仲自費咗九千多元去香港標準及檢定中心做檢測，結果都係話經過蒸氣消毒嘅口罩，過濾功能同口罩結構都唔會減低太多。
雖然Ann落力證明蒸口罩可行，但啲網民都唔多信咁，仲直指佢「死雞撐飯蓋」，亦有人玩嘢問：「落啲果皮會唔會香啲？」唔知Ann遲啲會唔會自己示範蒸口罩，增強說服力呢？
卓妮