中環出更：先登記再派罩 衍瀧師傅：免等又衞生
口罩依家好搶手，連醫護人員都話唔夠用。慈善團體泰緣妙佛堂，日前就送贈一批口罩同支裝水去聯合醫院，為醫護人員打打氣。創會主席衍瀧師傅話除咗醫護人員，市民亦可獲贈口罩，年滿六十五歲嘅老友記可以透過電話預約，然後於指定日子到佛堂領取，而傷殘人士更可獲送貨上門嘅服務。佢話呢種安排，長者既可免除排隊輪候之苦，又可減少交叉感染嘅機會。衍瀧師傅又話，某啲團體並無採取預先分流或預約登記，市民為撲口罩而搞到萬人空巷，未必幫到人之餘，睇落又好似做騷咁囉。
做好防疫措施雖然係當前要務，然而陷入寒冬嘅本地經濟，衍瀧師傅認為點都要幫吓手。佢話擔心小本經營唔撐得幾耐，所以自己同一班朋友都選擇幫襯小店，唔想市面蕭條就要支持本地消費咁話。
薪火相傳 周伯展鄭贊生樂助弱勢
香港眼科醫學院前院長周伯展，除咗秉持醫者父母心嘅專業精神，又因童年受過教會學校提供午飯津貼嘅恩惠，日後都樂意幫助弱勢人士，廿年來不時到內地或海外做義務白內障手術，兩位千金雖然並非繼承父業，不過都會跟佢去內地如甘肅等地方做義工。
疫情之下，佛堂總監鄭贊生對自己三個小朋友嘅衞生要求都嚴謹咗，譬如每逢返抵家門都要噴消毒藥水同洗手，以及將全套衣物更換清洗。佢話近來盡量深居簡出，就算同小朋友出街，多數都係去公園之類嘅空曠地方。在家活動主要係煮飯畀小朋友食。鄭贊生又相信助人精神係會感染下一代，譬如佢自幼就見到爸爸，收入雖然微薄但仍對老弱略施綿力，而佢嘅八歲大仔就得到老師讚許，話係熱心助人嘅好學生。
卓妮