政情：何俊仁住廈爆確診個案

新冠肺炎疫情肆虐，本港確診個案數字愈嚟愈多，市民人心惶惶。話說衞生防護中心前日公布咗一宗確診個案，患者居於天后廟道飛龍台，同樣住喺該處嘅仲有民主黨前主席何俊仁。

何俊仁回應傳媒查詢時，承認所住嘅大廈有確診病人，仲話喺傳媒報道之後，大廈已經即時加強清潔同埋消毒。至於個人方面，佢就話平時出入有戴口罩，嚟緊盡量減少返辦公室，而屋企就有加強清潔同埋暫停家庭聚會。

另外，何俊仁仲話日前喺屋企樓下見到當區區議員，唔止關注情況，仲有派口罩，佢都有份拎，仲希望患者早日康復。