政情：商經局亂噏拖累 工聯會設廠派罩 無辜被插掠水
全城一罩難求，政府早前宣布成立「防疫抗疫基金」，其中一項措施係資助本地生產口罩，仲假設以三蚊一個口罩咁包銷添！其中設工場整口罩嘅工聯會曾被質疑私相授受，即使「義務廠長」、勞工界議員何啟明重申「只派不賣」都冇人信，近日仲畀網民質疑開廠為掠水，而商務及經濟發展局尋日再次解畫，話三蚊只係假設。該局先前講到唔清唔楚，係咪幫倒忙呀！
「防疫抗疫基金」有成三百億元，當中十五億元資助本地生產口罩，政府話計劃一條生產線資助三百萬元，上限係二十條，政府會向每條生產線每月採購最多二百萬個口罩，如假設每個口罩平均售價係三蚊，政府可以十四億四千萬元包銷最多四億八千個。
已多次強調只派不賣
立法會財務委員會日前審議基金時，已有議員鬧爆用三蚊去買口罩太貴，又點名工聯會有整口罩，質疑政府同建制派係咪有利益輸送？雖然工聯會嘅議員多次強調口罩係只派不賣，仲反指民主派係唔抵得佢哋，而將抗疫工作政治化。商經局局長邱騰華亦講明唔會考慮廠商背景，又話三蚊只係假設，但似乎平息唔到爭拗，唔少網民繼續圍插工聯會，仲質疑工聯會開廠掠水。
斥鍵盤戰士抹黑造謠
何啟明就喺Facebook再拍片解畫，話工場嘅半自動形式生產線係由十一部機器組成，將十一部機器解讀為十一條生產線係貽笑大方，明顯提出質疑嘅人唔識廠嘅運作。佢又重申口罩只派不賣，而工聯會喺呢方面冇資金壓力，至今已籌到四百一十萬元，跟住就反駁班網民，話做鍵盤戰士喺網上轉發訊息係唔使負責任，與其喺度抹黑、妒忌同造謠，倒不如齊心抗疫。
可能見惹起爭議，商經局尋日再次回應計劃詳情，話三蚊只係一個假設，用嚟估算喺包銷口罩時所需要嘅承擔額，以便向立法會申請撥款。局方仲話依家同香港生產力促進局研究緊一個合理價格，會考慮原材料價格同廠房租金等生產成本，遲啲就會公布相關方程式，唔排除因應生產成本嘅變化而喺一年嘅包銷期內釐訂唔同時段嘅包銷價。同時，局方仲講明每條生產線嘅實際資助金額主要視乎其產量而定，會公開、公平、透明的原則，嚴謹審核每宗申請。即係點呀？又唔同價呀？
無論係防疫同抗疫工作，市民鬧爆政府無能，勢估唔到連呢啲基本嘅資料都噏唔清楚，搞到工聯會都被拖落水，唔知點收科？