中環出更：利慧玲賣畫 助澳洲火災幸存動物
澳洲山林大火焚毀大量林木，就連棲息喺郊野嘅動物亦都死傷枕藉。本地藝術家利慧玲（Emily）日前就舉辦個人慈善畫展，展出野生動物肖像嘅畫作之外，又將作品嘅有限複印本義賣，籌募善款以救助澳洲火災幸存嘅野生動物。
Emily曾遠赴到非洲為某志願組織做義工，協助照料曾遭汽車撞傷或獵人槍口下歷劫餘生嘅貓科動物，如獅子同獵豹等猛獸。儘管佢負責嘅工作唔算複雜，又同猛獸保持適當距離，但就令佢深感人類不斷進犯大自然，嚴重威脅野生動物嘅生存權益。今次澳洲山林大火，野生動物縱使檢回一命，亦往往會受到燒傷或面臨棲息地盡毀，極需人類伸出援手嚟渡過危厄。佢又話地球資源應該係人類同動物共享，而人類文明嘅高低，在於尊重同善待生命，而唔係奴役動物。
江碧蕙：對待動物反映人品
今次善舉不但得到畫廊老闆George Mihaylov嘅襄助，Emily嘅好姊妹、騎術教練江碧蕙亦偕夫現身畫展以示支持。江碧蕙憶起往日有兩個印象深刻嘅畫面，其一係喺法國進修期間目睹當地馬廄內竟有一隻羊，原來係用嚟安撫馬匹嘅情緒；另一係本地某良駒曾遭飼養員虐打，以致聽到對方嘅談話聲即躁動不安，可見動物係有靈性同情感，不容苛待。江碧蕙認為一個人嘅品格，往往會反映喺對待動物嘅態度上，所以將退役良駒送往海外頤養天年嘅馬主，佢都非常欣賞。
天乙慈愛基金會創辦人李衛銘都有出席畫展。研究堪輿學嘅佢指自然界嘅山火有周期性，雖然術數可以預測，但唔代表在劫難逃，反而係預知危厄在前，盡力加強保護措施，事後做好補救工作，咁就一切禍患都得到最大程度嘅化解。
卓妮