政情：鄭慧賢趁停課 身教仔女勤洗手
疫情擴散，全港大專院校、中小學同幼稚園要延後復課，育有五個小朋友嘅仁愛堂副主席鄭慧賢（慧慧） 自責以往唔係一個合格嘅媽媽，好多時都係工人照顧仔女，所以趁住停課呢段時間，珍惜同小朋友相處嘅機會。
幸好公司已上咗軌道，依家慧慧喺屋企照顧小朋友就輕鬆咗好多，而學校老師會透過視像通話觀察小朋友喺屋企做功課，佢就喺旁邊睇住。俗語話「言教不如身教」，慧慧不斷提醒仔女「勤洗手」同注意個人衞生，而就嚟六歲嘅大仔更加識得指導細佬同細妹添，而細佬妹亦好聽哥哥話，會自動自覺排住隊洗手。
贈防疫物資予弱勢社群
防疫物品供應短缺，慧慧話唔忍心見到啲公公婆婆通宵排隊喊住買口罩，決定購買防疫用品，將物資親自送畀老人家、學校、露宿者同弱勢社群，避免排隊而出現混亂。
由於防疫用品價錢都唔平，所以佢都要用一個比較高嘅成本、經朋友透過唔同渠道，幾經辛苦先喺外地訂購到兩萬個口罩、大量眼罩同消毒液返嚟，佢話好想出一點綿力，幫得幾多得幾多。