政情：善長自資買兒童口罩 今派錫克廟
市面上嘅兒童口罩短缺，基層家庭難以負擔昂貴價格，令子女相對缺乏保護。有見及此，兒童事務委員會非官方委員自資購入一萬個兒童口罩，尋日派畀旺角、大角咀同深水埗區內有需要嘅兒童，亦計劃今日喺灣仔錫克廟繼續派發。
呢一萬個兒童口罩，有部分送到十個以服務兒童為本嘅非牟利組織，兒童事務委員會非官方成員一行十幾人，尋日更親身到大角咀同深水埗一帶嘅劏房及板間房派發口罩。考慮到少數族裔家長未必有足夠資源購買口罩，佢哋亦到訪「香港赫特穆諾博瓦伊斯蘭理事會」，贈送口罩畀穆斯林的兒童。
黃梓謙：劏房戶難負擔
委員黃梓謙話探訪嘅劏房戶家庭，有啲家長話根本一個兒童口罩都冇，有啲只有一、兩個存貨，令人憂心又難過。佢話知道啲住戶一方面搵唔到兒童口罩，另一方面係價錢太昂貴，根本負擔不起，確實好無助。另一名委員葉柏強話基層家庭嘅居住環境擠迫，生活空間狹小，兒童大多營養不足，唔單止較容易受感染，病情普遍較為嚴重，亦往往缺乏保護同被關注，希望今次活動可喚起大眾關注。