政情：泛民老屈唔撐派錢 建制怒斥含血噴人

泛民主派前晚喺會議完結前引用財委會《會議程序》第三十七A條，先後提出十項臨時動議，其中一項就係AY要求政府透過運用三百億元基金嘅款項，向全港所有年滿十八歲或以上嘅永久性居民派發一萬蚊。動議遭否決後，AY隨即喺Fb貼文，話唔好等到兩、三個月後先通過嘅財政預算案派發。又話政府今次要多謝建制派否決動議，又假設預算案會全民派錢，覺得派錢就可以綑綁市民反對嘅撥款（例如警隊開支）一同通過。

轟提出臨時動議整色整水

民建聯尋日喺Fb反駁AY後，該黨議員周浩鼎更拍片，直斥反對派含血噴人，「老屈」建制派，鬧爆反對派借啲意「拉布」係「惟恐天下不亂」同「整色整水」。佢解釋，建制派統一否決處理十個臨時動議嘅原因，關鍵係避免節外生枝同製造機會畀反對派「拉布」，繼而衍生唔知幾多個鐘頭嘅辯論，最終導致無法通過基金撥款。

撐通過撥款 泛民精神分裂

身兼行政會議成員嘅葉劉淑儀亦批評反對派手法卑鄙，圖抹黑建制派一直以嚟嘅努力，佢提到反對派一方面宣傳建制派否決全民派錢，一方面又同意呢個冇加入全民派錢嘅議案，反問佢哋係咪精神分裂同惡意中傷？葉劉又話有五十九人贊成，三人反對通過撥款申請，意味住大部分反對派都同意撥款，佢覺得如果反對派認為必須將派發一萬蚊嘅建議放入今次撥款裏面，大可以投反對票。

財委會主席陳健波（波哥）亦喺Fb上載短片，不點名批評AY「老屈」。波哥指建制派被人大做文章、「屈得就屈」。佢解釋，其實好多建制派議員都主動要求財政司司長陳茂波派錢，而為咗分秒必爭同紓解民困，確保撥款申請可以喺前晚通過，先決定急市民所急，反對呢啲被形容為「有姿勢，無實際」嘅臨時動議。

波哥又話，如果投票通過呢啲無法律效力、政府又可以唔理嘅動議，由於每項動議容許每人講多三分鐘，又要再投票，肯定前晚唔能夠通過撥款，所以建制派否決呢十個臨時動議係有原因嘅，仲叫大家唔好怪錯好人呀！