中環出更：喺公司搞防疫小組 董吳玲玲：入室先換鞋
疫情不斷擴散，無論家居同工作間都要做好防疫措施。原來香港善德基金會（基金會）主席董吳玲玲喺自己公司搞咗個防疫小組，確保進出公司所有員工安全。
董太話防疫措施包括提醒員工注意個人清潔、留意有冇發燒、用酒精消毒液洗手，亦喺公司門外放置一批拖鞋，所有人入公司都要先換拖鞋，就連基金會副主席鄭穩偉到訪都唔例外。內地工廠亦開始復工，董太話暫時有三分之一嘅員工仲喺鄉下未返到，所以會彈性處理，首要係工人自己安心先返嚟，大家有商有量，爭嗰十日八日冇所謂喇！
由於疫情嚴峻，基金會日前召開常委會會議，決定撥款五十萬元成立「新型冠狀病毒支援抗疫基金」，全力推進社會疫情防控工作。對於外界批評政府太遲成立防疫抗疫基金，董太就話要體諒政府，起碼都有做到嘢，由於疫情嘅嘢每日變化，政府應特事特辦，加快速度。
蕭楚基：員工隔離 唔夠人手
仁愛堂諮議局委員蕭楚基話旗下有幾間食肆已停業，唔單止係市道唔好，亦因多位內地度歲嘅員工回港後須自我隔離十四日，以致店舖唔夠人手亦係原因之一。佢又話廿年嚟都長期保持口罩充足庫存，仲話要防止飛沫，食物有脫髮都唔合衞生，因頭髮亦係細菌同病毒嘅溫床，所以接觸食品嘅員工必須佩戴髮網。
香港潮州商會前會長胡劍江最近啱啱送囡囡返澳洲讀書，笑言好彩返得及時，因現時中國留學生都被拒絕入境，驚遲咗會遇上阻滯，甚至要接受強制隔離等。佢喺澳洲亦有幫手搜購防疫物品，而海外嘅生意夥伴亦雪中送炭，寄贈防疫物品，令佢公司嘅員工得到充足嘅防疫物資。最近市道唔太好，佢就積極發展「跨境電商」，大力發展網購，睇嚟真係有危就有機。
卓妮