政情：謝偉銓搞視像評審比賽 避疫災
疫情仍未受控，唔少活動都取消或改期，好多機構仲實行在家工作制添！依家有學校都轉用視像會議形式上堂，而建築、測量、都市規劃及園境界議員謝偉銓都有樣學樣用視像會議，但就唔係上堂，而係為設計比賽進行評審工作。
深圳局方主辦 百港青參與
設計比賽係由深圳市前海深港現代服務業合作區管理局主辦，係一個專畀香港青年嘅建築設計比賽，都有百幾人參與，由九位嚟自香港同深圳嘅專家做評審。
依家由內地入境本港嘅人士都要強制隔離，個比賽都唔知點做評審？有計嘅。負責統籌嘅謝偉銓就同班評審一齊做視像會議，大家隔空咁睇住啲資料同模型做評審，最終都順利揀選到作品。疫情唔知幾時先結束，睇嚟愈嚟愈多人會利用視像會議去溝通、交流喇！