政情：網上互動授課 梁美芬盲摸摸
依家中小學停課，大學都停止面對面嘅課堂。正所謂停課不停學，大學都轉用網上授課，但就考起身兼城市大學法律系副教授嘅議員梁美芬（Priscilla）喇！佢用咗八個鐘先學識網上授課系統。
用咗八個鐘先學識
Priscilla日前喺Facebook貼文，話佢首次喺城大網上授課。開始上堂前一個星期，城大安排教職員學點用網上系統，雖然佢喺十幾年前曾接觸過網上教學，但當時無深入咁去學，所以今次佢用咗八個鐘先學識呢套系統，仲一路學一路抄筆記，模擬學生嘅角度上堂，再不斷練習，終於網上第一堂順利完成。
佢話網上教學既可望到學生嘅樣，又可對話，夠晒互動，學生就算唔喺香港或留喺宿舍都可上堂。佢仲話反修例運動同依家肺炎疫情都令立法會唔少會議取消，建議可考慮網上開會，唔使因社會情況而停晒手。