政情：羅致光博鬧 揸車返工 閉門辦公 自誇22日冇戴罩

稱間接慳咗畀有需要嘅人

疫情不斷擴散，港府早前宣布公務員可以在家工作，羅致光喺網誌話勞福局雖然都係在家工作，但喺必要時都會返政總開會。眼見依家出街人人都戴口罩，但佢聲稱冇用過口罩，解釋話廿二日以來都冇去人多嘅地方，而佢返政總就選擇自行揸車，冇搭過公共交通工具，所以一個口罩都冇用到。

依家唔止政府，就連好多大企業都響應「Work from Home（在家工作）」。雖然政府就話在家工作，但羅致光就話自年初一以來，廿二日都要喺政府總部開會，討論有關防疫方面嘅工作。而佢仲大呻，除咗開會之外，自己好多時都係「Office alone（獨自在辦公室工作）」，莫非係有弦外之音？

政府撲罩無方 市民恐慌

話說疫情喺上月底開始爆發，全港市民都為咗口罩而瘋狂，為咗買口罩搞到要通宵排隊，但政府做咗啲乜嘢？政府竟然話全球採購口罩有困難，上個禮拜仲話訂咗逾五千萬個口罩，但只得四百萬個抵港，返嘅貨唔夠訂嘅貨十分之一，而且先派畀醫護人員同其他前線人員，唔知幾時先派到畀市民。

眼見市民撲口罩撲得咁辛苦，無論係區議員、政黨抑或係社會人士，個個都出盡辦法去搵口罩，有啲人就親身去唔同國家買，又有啲人四圍撲材料同機器返港，甚至有人會研發新布料去製造口罩。面對依家一罩難求嘅局面，作為問責官員嘅羅致光仲自誇話一個罩都冇用，仲話自己慳咗口罩添！

政府早前實施「限罩令」，話唔符合條件嘅，戴咗口罩都要除番落嚟，不難令人覺得羅致光係喺度認叻，雖則慳到口罩係好事，但依家最重要係搵口罩，收得納稅人出嘅糧，唔該佢做實事，唔係喺度讚自己呀！