中環出更：派錢唔派消費券 葉劉發文「放酸」
政府上星期五宣布成立「防疫抗疫基金」，涉及唔少於二百五十億元撥款，派錢資助食肆、零售店、旅行社、物業管理公司同低收入家庭等，但就係無提到議員葉劉淑儀一直以嚟提議嘅全民派消費券。葉劉仲覺得政府已向相關政黨「通水」，傾向只會派發現金，而唔係消費券，唔怪得好似搞到葉劉咁葡萄喇！
身兼新民黨主席嘅葉劉日前喺Facebook（Fb）貼文提及為抗疫基金執漏，話市民批評得最多嘅係派發津貼嗰部分，事關政府話向二十萬個低收入家庭發放五千元，但無論係三無人士、打工仔同中產都大受影響，所以坊間不滿之聲不絕，又話該黨一直認為政府應該發放一萬蚊嘅消費券或現金。
呢篇文章又再提到消費券，實際上喺政府上周五公布相關措施後，葉劉當晚就喺Fb話澳門政府向居民發放三千蚊電子消費券，又話澳門人口比香港少咁多都做得到，港府仲猶豫不決，尤其該黨已多次向財政司司長建議派一萬蚊嘅消費券，分為飲食、零售同旅遊三部分。
話政府放棄直接刺激經濟
全篇文酸味最濃嘅係，葉劉話根據傳媒報道，近日有建制派政黨都向政府建議向市民派發一萬蚊現金，佢相信政府已同相關政黨「通水」喎，仲話如果政府傾向淨係派發現金，等於放棄咗直接刺激經濟同創新嘅機會，又話雖然派發現金有助市民紓困，反問政府點解唔直接注資最受影響嘅行業，達致「保就業，撐企業」嘅效果呢？
卓妮