中環出更：靈活上班 打破框框 叢曉日：海灘辦公有得諗
共享經濟崛起，掀起新嘅工作模式，傳統朝九晚五寫字樓生涯將來或會不合時宜。金紫荊女企業家協會主席林淑怡察覺到時下上班族，尤其年輕一輩嘅打工仔較鍾意靈活同有彈性嘅上班模式。對僱主而言，只要員工交出成績同守紀律，跳出固有框框亦唔係冇得考慮。協會早排搞咗個午餐聚會，經營共享空間嘅創業家叢曉日（Elaine）就即場分享工作場所嘅演變同發展趨勢，仲話遲啲喺海灘上辦公未必係冇得諗咁話。
Elaine話，過去為迎合中小企，部分大型寫字樓會分間成多個細單位，即係俗稱「商業劏房」嘅服務式辦公室。依家年輕世代識得把握科技帶嚟嘅商業機遇，從而衍生大量初創企業，而傳統嘅服務式辦公室未必切合佢哋需要，共享空間嘅工作場所亦應運而生。Elaine話，同舊時父輩每年頂多一、兩次商務旅行相比，佢依家幾乎每周都要出門公幹，不過仍可指揮公司如常運作，令佢相信工作模式喺科技促使下會愈趨靈活，廿幾年後，或者喺海灘上辦公都唔係異想天開喇。
周宛賢：共享空間有利交流
當日出席午餐會嘅仲有協會副主席常務李凱琪、執行委員葉鎧沂、會員陳沁弦、香港表廠商會秘書長周宛賢同藝術收藏家余一樂。周都認為以共享空間為工作場所，有利於年輕創業者同其他業界人士接觸交流，啟發靈感，對講求時尚同創意嘅品牌經營尤其有幫助。但由於會計同人事部需獨立房間以符合保密要求，所以相信傳統嘅寫字樓仍會係工商業界嘅工作場所咁話。
卓妮