政情：當年沙士困屋兩星期 黃傑龍悶到唔剃鬚
如果要留喺屋企兩星期足不出戶點算好﹖稻苗學會會長黃傑龍（Simon）日前提及二○○三年沙士時曾經喺內地被強制留喺家中十四日，頭兩日佢都仲接受到，但後來真係好悶，惟有苦中作樂，搵啲嘢自娛。咁佢玩咩呢？原來就係特登唔剃鬚，睇吓有咩變化，聽落都幾無聊噃。
Simon當年喺上海做工程師，當時本港疫情嚴重，但都趁五一假期返港探父母。點知假期後佢拖住篋返到上海屋企樓下，就有街道辦人員好緊張問佢邊度返，Simon雖然明知要接受強制家居隔離，但都唔敢講大話，惟有如實告知對方。
同事代買嘢食 擺屋企門口
佢記得當時要連續十四日探熱同唔准離開屋企，一日三餐都要靠當地幾位香港同事幫手買。佢仲話，當時等咗好耐都未見同事，打電話問先知同事已經將食物放喺佢屋企門口，真係搞笑。佢仲話因為喺屋企真係好悶，所以就決定唔剃鬚，每日影相記錄，不過依家已經唔記得啲相喺邊喇。