政情：打邊爐如病菌池 李家仁話兒童不宜
打邊爐一路滾一路食，無疑係極具暖意嘅飲食方式，不過有「兒歌醫生」之稱嘅李家仁就話，圍爐飯敍存在衞生風險，小朋友尤其不宜咁話。
李家仁解釋，打邊爐嘅食材唔少都係生肉，小朋友如果唔夠耐性，就有可能喺未完全灼熟食物嘅情況下就放入嘴裏品嘗，而更令人憂慮嘅係如果咬咗一啖發現原來唔熟透，再放入鍋內滾兩滾，咁就好易造成交叉感染喇。佢仲提到，鍋裏面嘅湯底如果唔夠滾熱，就有如病菌嘅游泳池，對身體健康頗為不利，加上進食距離同發出熱源嘅爐具相當接近，亦都可能會熱氣喎。
非常時期更要小心飲食
李家仁又認為，目前全城正受新冠肺炎疫情困擾，更加要小心飲食，避免病從口入，因為一旦因為飲食不當，導致上吐下瀉同發燒，難免就要接受一連串嘅診斷程序，以確定是否感染新冠肺炎，就算之後證實只係患腸胃炎，但就飽受一場虛驚，咁就好唔值得喇。