政情：區鎮樺教精細佬 開會咪舉手嗌食飯
今屆區議會大洗牌，唔少當選嘅都係議會新丁，即使上任前努力惡補，都未必熟習區議會生態同運作。大埔區議員區鎮樺有十二年區議員經驗，佢弟弟區鎮濠去年就首次當選大埔區議員。區鎮樺被問到有冇私傳秘技畀弟弟時就話，教咗細佬開會時唔好舉手問幾時食飯喎。
唔好作無謂發言
區鎮樺咁講，唔通佢當年新上任時撞過板？佢就話呢個真係佢嘅親身經歷嚟，不過佢就唔係當事人，而係十幾年前，有一次開會開耐咗，有一名平時比較少發言嘅議員突然舉手，正當大家都好奇想知佢會發表咩偉論時，該名議員就問咗句：「幾時食得飯？」所以區鎮樺就教細佬區鎮濠，若果覺得肚餓，就自己慢慢行出去食啲小食，唔好喺開會期間作無謂發言喇。區鎮樺仲教路，話平時要把握機會練習發言，開會時先可以做到伶牙利齒。
佢又提到，多區區議會換屆後開會時間都比以往長，甚至會開到凌晨，不過佢哋大埔就好啲，雖然都唔可以好似以往咁中午就完會，所以佢哋今屆就特別增設咗過往冇嘅午膳時間喇。