政情：囡囡唔肯戴口罩 容海恩實施「隔離」
最近政府宣布所有經內地入境人士均需接受強制十四日家居檢疫。議員容海恩（Eunice）就「有樣學樣」，將兩個囡囡都留喺屋企強制隔離。莫非佢哋最近從內地入境？定係撲唔到口罩，所以為防受感染而唔出門呢？
原來兩樣都唔係，而係Eunice兩個囡囡都扭計，有口罩都唔願意戴，為安全起見，Eunice就唔准囡囡出街。呢排口罩供不應求，Eunice話佢都去咗好多地方，但都撲唔到小童口罩，好在佢媽咪屋企有幾個剩低。本身諗住有口罩，可以帶兩個女出街，但無論點氹兩個女都唔願意戴，別無選擇下惟有將囡囡留喺屋企「隔離」。
買定紙巾米 未受搶購潮影響
最近唔止個個搶購口罩，市面上亦出現大批市民搶米、搶紙巾等。佢就話平時買生活用品都習慣咗喺網上訂貨，每次都買兩、三條紙巾同廿斤米。至於點解買咁多，佢就話，網上購物買多啲，價錢就會抵啲，又話自己一向好「慳家」喎，所以短時間內嘅搶購潮對佢同屋企人都冇乜大影響嘅。