政情：鄧家彪口多 寸人賣罩貴 累黨友補鑊
新冠肺炎疫情下，市面上「一罩難求」，政團紛紛透過唔同渠道撲口罩，其中香港眾志早前就話喺外地採購到十萬個口罩出售，不過就畀勞工顧問委員會委員鄧家彪（阿彪）狙擊，又引述其黨友何啟明指一個口罩成本只係兩毫子，質疑點解眾志賣九十八元一盒咁貴。點知阿彪今次攞威不成捉晒蟲，事關佢被網民鬧爆「識彈唔識做」，網民仲質問何啟明，佢哋啲口罩係咪會賣兩毫子一個。面對黨友幫倒忙，何尋日就急急拍片補鑊，相信佢都一額汗喇。
眾志之前賣口罩但就被指重複扣錢，搞到一鑊泡要急急澄清，作為敵對陣營抽水都好正常，阿彪都有質疑眾志口罩賣得貴，又話啲口罩應該免費派畀社會上有需要嘅人如獨居長者、長期病患者、前線醫護人員同清潔工等。之不過阿彪有關口罩價錢嘅言論就令一眾網民質疑，仲引起網民對阿彪所屬嘅工聯會將會製造嘅口罩嘅「興趣」，質問該會製造嘅口罩係咪都係每個兩毫子咁平，真係無啦啦燒埋自己個疊喇。
話材料先係值兩毫二
何啟明應該都知今次捉蟲o架喇，急急腳尋日就拍片上載至社交平台，逐一解答網民質疑。佢就話，每個口罩平時嘅純材料價大約係兩毫二，包括面料、耳繩同鼻線，不過租金、人工、運輸，仲有高規格嘅無塵工作間廠房嘅成本都係未計落去啦，又話如果真係有人兩毫子賣畀你，佢自己都想要兩盒。係咪暗寸阿彪唔知價，就何啟明自己先知喇。
政團生產口罩惹質疑
有網民就質疑工聯會口罩產量講到唔清唔楚，究竟個工場係日產十萬個口罩，定係月產十萬個呢﹖何就話，佢哋暫時會用半自動機器製造先，所以只能夠月產十萬個，等到日產十萬個嘅全自動機器於三月底至四月初到位，就可以日產十萬個喇，強調呢段時間佢哋會同時間競賽，做得一個得一個，完成之後亦唔會牟利，只會派畀香港人。此外，亦有網民問及，佢哋個工場係咪請人返工，何就指相關招聘事宜同工聯會冇關嘅，又話會繼續分享工場生產口罩嘅進度，希望香港人可以齊心抗疫。
政團向市民派發或出售口罩，如果真係可以一解市民燃眉之急當然好事，但稍有不慎，攞唔到分變扣分，就真係大鑊喇。