中環出更：隔離營掀民憤 政府有地唔用 梁敬國𢱑爆頭
受到新冠肺炎疫情影響，政府要撲地方作為隔離營同指定診所，但屢因選址均喺民居附近，而受到當區居民嘅反對，結果各區都有街坊同示威者上街鬧爆抗議，批評政府喺民居搞檢疫中心係咪想播毒。商務及經濟發展局前副局長梁敬國（Godfrey）日前就𢱑晒頭，話本港有撻地又大又遠離民居，唔明點解政府唔用呢塊地咁話。
啟德空地 遠離民居
Godfrey所指嘅用地其實就喺舊啟德機場嘅空地。佢話，嗰度既遠離民居，又唔近郵輪碼頭，而且得一條車路入到去，附近空間同泊車位都有好多，係一個組裝臨時檢疫中心嘅完美地點。雖然依家嗰度只係一塊空地，但如果政府有心採用嘅話，相信幾個禮拜就搞得掂。
好多網民都認同Godfrey建議嘅選址，但就擔心啲地可能已經畀發展商買晒。Godfrey就話，雖然唔了解詳情，但就百分百相信，如果政府肯出手，冇一個發展商敢「Say no（說不）」。其實Godfrey講嘅都唔係完全冇道理，但政府肯唔肯採納坊間智慧，就係未知之數喇。
卓妮