政情：公民講場：政府訂罩 到貨不足一成 劉怡翔難辭其咎

確診個案愈爆愈多，但係一罩難求，尋日有位視障獨居長者因攞唔到口罩淚灑當場，事關佢因為冇口罩已經幾日冇出過街嘞！政府做到乜嘢？正如政府物流署話向外訂咗五千三百萬個口罩，已經返咗四百萬個。真係叻喇！返嘅唔夠訂嘅十分之一，呢啲仲要先畀政府部門用，唔知要等第幾批、等幾耐，先落到市民手中。點解啲商販又入到貨，仲抬高嚟賣？負責呢瓣嘅財經事務及庫務局局長劉怡翔唔好再用採購難嚟做藉口，根本冇人信。