政情：教師中心投票延期 葉建源感奇怪

教師中心嘅諮詢管理委員會係負責搞活動同埋管理經費，管理委員會一共有七十二席，兩席由教育局委任，其餘就有三十五席係教育團體選出，另外三十五席就由全港教師選出。

今次換屆選舉喺上月中開始投票，原定喺今個月結束，新一屆就喺四月換屆，而教師就要喺所屬學校投票。不過，教師中心秘書處日前就話暫緩選舉，稱依家正式復課嘅日期仍要進一步評估，畀學校聚焦準備復課安排同埋其後嘅工作，所以延至九月或十月先恢復選舉。

教協質疑違程序公義

喺今次選舉中，教協推薦三十四人參選，對於今次延期，佢哋就話秘書處冇諮詢過教師中心常委會嘅意見，質疑咁樣係違反程序公義，認為投票安排會造成混亂，或者會出現教師雙重投票嘅情況。

身兼教育界議員嘅葉建源就話，過往冇乜人重視選舉，認為延期到九月係好奇怪，或者會令到諮管會出現懸空，又或者係延長現屆委員任期。佢仲話，其實選舉程序簡單，認為復課就進行投票會較理想。