政情：工程項目大塞車 泛民拉布阻撥款 建造業促加會審批

建造界大聯盟發言人謝子華尋日去信畀立法會主席梁君彥，直指政府工務工程已連續數年大幅下跌，喺二○一八／一九年，全年只批出約五百億元工程，比原先估計少咗一千二百億元，而二○一九／二○年，政府預算推出約二千億元嘅工程中，至今只批出唔夠三百五十億元，相差一千六百五十億元。

嚴重影響工人生計

信中指出，依家喺財委會排緊隊審批約有六百一十億元撥款，呢筆撥款包括咗上個立法年度嘅四百億元同今個立法年度嘅二百一十億元。唔單止咁，喺工務小組委員會方面，二○二○／二一年度基本工程儲備基金嘅整體撥款二百二十三億五千萬元亦受到阻延，令七十五項涉及逾一千億元嘅新工程受到積壓。

謝子華亦喺信中大吐苦水，話連續數年嘅工程量缺口，以及財委會同工務小組審議工程撥款嘅工作進展極度緩慢，令建造業界，特別係工程專業有關人員同工人生計造成嚴重影響，促請財委會加開特別會議，集中審批工務工程項目撥款，追回延誤，同時希望所有議員喺抗疫嘅同時，亦暫時放下政治議題，盡職責出席會議，避免流會等事情發生，盡快審批工程撥款咁話。

陳健波插針狂加會

就因為工程撥款大塞車，工務小組委員會主席盧偉國同財委會主席陳健波，幾乎有位就插針，不停咁加會，根本就係想快啲通過積壓咗，尤其係同民生有關嘅工程項目，之但係工務小組委員會過咗嘅項目，排到上財委會都有排等。

其實陳健波都好頭痕，事關佢加咗會希望可以疏導大塞車，點知班泛民主派議員喺公務員加薪嘅撥款申請拉布，經過多次會議都未表決。佢之後仲話要不斷加班，之但係又遇上新冠肺炎襲港，受疫情影響更加要取消本周兩節會議，而嚟緊下個禮拜嗰兩節會議都未知開唔開得成，真係唔知點算好？