中環出更：多個委員會會議取消 何啟明擬攝期傾產假
因應新冠肺炎疫情擴散，立法會已取消本周召開嘅大會同多個事務委員會會議，而下周亦有多個事務委員會會議取消，要另訂日期開會。至於下周三大會同工務小組委員會，以及周五嘅財務委員會係咪如期召開，則未有決定。
按照尋日發出嘅文件指出，政制事務委員會宣布取消下周一嘅會議，而原定周二召開嘅交通事務委員會鐵路事宜小組委員會、人力事務委員會、福利事務委員會同公務員事務委員會，呢幾個委員會嘅會議亦要另訂日期，而周五召開嘅交通事務委員會亦會改期。另外，本來喺周六召開嘅工業大廈政策相關事宜小組委員會會議亦要延期舉行。
以安全為先
人力事務委員會原定本周召開特別會議，討論有關增加產假嘅事宜，但呢個會議已經取消咗，而下周又再取消會議，會唔會拖延相關嘅進度？委員會主席何啟明就話下周召開嘅係恒常會議，由於增加產假係市民好關注嘅議題，佢亦會視乎疫情嘅進展，再同秘書處商討，睇吓遲啲可唔可以攝期，早啲召開特別會議，但一切都要以安全為最先考慮因素。
卓妮