中環出更：人間有情 李暉獲魚販慨贈口罩
依家口罩同酒精搓手液都缺貨，市民周圍撲貨，藥房門口大排長龍。卓妮早前喺中環一間超級市場見到武術界名宿李暉喺度買餸，佢都有戴住口罩，依家一罩難求，唔知佢又有冇四出撲口罩呢？
李暉話原來佢本身冇戴o架，係超級市場賣魚嘅職員見佢冇戴即刻畀個佢。喺口罩咁珍貴嘅時候，賣魚職員真係好慷慨。李暉話預防疫症最緊要強身健體同埋保持空氣流通，佢買餸前嗰朝早都有去打太極，每個人相隔一米，又喺空曠嘅地方打，都唔使戴口罩嘅，不過，如果去人多嘅地方或者搭公共交通工具就要戴喇！
伍婉婷派罩 緩解市民所急
之後卓妮又喺商場見到文化力量秘書長、灣仔前區議員伍婉婷，佢一個人入咗間女裝店睇衫。佢話灣仔區口罩都缺貨，出現搶口罩潮。佢嘅辦事處本身都有啲口罩畀市民拎，今次疫情佢都盡量派晒出去，只係留番啲畀自己同屋企人。
伍婉婷又分享咗個小故事，佢話有個街坊去買麵包，同麵包店店員講起屋企唔夠口罩畀小朋友戴，店員二話不說就將兩個口罩送畀佢。佢話雖然只係兩個口罩，亦都展現咗人間有情。
林健鋒行街食飯振興經濟
商場人流疏落，但畀我哋見到商界議員林健鋒行街睇衫。佢話啱啱喺附近同朋友食完飯，餐廳都係得幾枱食客，佢諗住行吓街振興吓經濟咁話喎。佢又話佢所屬嘅商會都打算訂啲口罩派畀市民，但始終都需要少少時間。
對於有人話即使去到外地，例如日本，當地嘅口罩都賣斷貨，林健鋒嗰時啱啱由日本返嚟，佢話旅遊區當然冇晒口罩賣，但由於日本人自己有戴口罩嘅習慣，所以去偏遠少少嘅地方都仲有得買嘅。
卓妮