政情：再為唔開大會解畫 梁君彥話預防播毒
新冠肺炎疫情肆虐，政府喺上月底開始實施公務員在家工作，多個立法會會議因而改期或取消，連本周三嘅大會都取消埋。主席梁君彥尋日回覆議員信件時，再次就取消本周大會解畫，仲反駁班議員，話取消會議唔係拒絕履行憲制職責，話如果開會令喺大樓執行職務嘅人士受病毒感染，對未來數月嘅運作影響仲大。
喺早前梁君彥宣布取消會議後，廿幾位民主派議員就去信要求召開大會並先行處理疫情事宜，仲話取消會議就冇咗平台質詢政府，指依家係非常時期，但以人手為由拒絕履行《基本法》賦予嘅重大憲制職責，就有凌駕性公共利益嘅疫情事宜進行辯論，對政府防疫工作提出質詢，認為做法可笑。
幾百人聚集 增傳播風險
梁君彥尋日回覆議員嘅信件就再次解畫，話抗疫係當前社會各界嘅首要急務，若果會議舉行，至少有幾百人喺大樓聚集，無可避免會增加病毒傳播風險，同當前抗疫嘅目標背道而馳，仲話有責任為秘書處職員提供適當保障，而唔開會係希望同全民齊心協力，盡快控制疫情，務求將影響減至最低。