政情：大埔街頭擔櫈開區會 議員離席促行動防疫
因應新冠肺炎疫情，政府日前宣布停止未來兩星期各區嘅區議會會議，相關部門亦都唔會提供場地同秘書服務，但大埔區議會醫療、教育及社會服務委員會尋日就召開今年度首次會議討論疫情等問題，但就要喺街頭擔櫈仔開會嘞，仲通過譴責政府單方面取消會議。
通過動議譴責 轟政府不尊重
由於場地問題，會議轉喺大埔墟街市及熟食中心二樓平台開會，議員要自帶擴音器材，擔櫈仔開會。會議甫開始，區議員關永業就提出臨時動議，強烈譴責政務司司長張建宗單方面取消區議會會議係極唔尊重大埔區議會嘅行為，最後更以十五票贊成通過動議。
其後就進入討論疫情問題，但區議員黃兆健就認為如果大眾擔心自己健康，憂慮疫症喺社區傳播，應該要避免聚集人群，尤其公眾會議場合，可能會令社區傳播疫情風險增加，認為區議員應該將當區居民健康放喺首位，於是離席去監督屋苑同處理防疫問題。