政情：唔夠膽深入疫宅？陳恒鑌：費事嘥保護衣

青衣長康邨康美樓早前出現新冠病毒確診個案，患者被送入醫院，家人就被隔離觀察，但係單位就一直冇人去消毒同清洗喎。葵青區議員梁嘉銘尋日就喺社交平台直播，影片仲見到佢身穿保護衣，聯同議員陳恒鑌同食物環境衞生署嘅職員去該單位進行大清洗，唯獨陳恒鑌冇入去，莫非佢唔夠膽、驚傳染？

原來，患者嘅屋企人淨係委託梁嘉銘同工作人員入去單位，所以需要穿着保護衣。影片中，陳恒鑌形容梁「Full Gear（全副裝備）」、着到好似成個「太空人」咁，而陳因為唔需要入去，就費事浪費多一套保護衣啦，並唔係唔夠膽嘅！

另外，陳恒鑌仲話已要求食環署職員清理埋大樓嘅走廊同電梯，成條走廊都「大清洗」，而清潔行動結束後，兩位議員話會派消毒丸畀街坊，仲話遲吓會幫街坊團購物資，希望大家都可以健健康康。