政情：政府撲罩不力 無心抗疫 議員促審計衡工量值
依家「一罩難求」，甚至有醫護人員話醫院防護物資不足，亦有私人執業診所因缺口罩而需要停業，政府連在外採購口罩都話有困難，畀市民鬧爆呢個無能政府，會計界議員梁繼昌尋日去信審計署署長朱乃璋，要求審計署考慮就政府執行防疫政策同預備防疫物資嘅事宜進行審計喎。
身兼立法會政府帳目委員會副主席嘅梁繼昌話社會有強烈聲音期望政府介入，穩定口罩供應，但政府就話依家物資短缺，外國都採購唔到。佢覺得呢個情況不利香港社會對抗疫情，亦都打擊市民對政府嘅信心。佢喺信入面問到，政府有冇參考嚴重急性呼吸系統綜合症專家委員會喺二○○三年發表題為《汲取經驗 防患未然》嘅報告，制訂有關政策，特別係政府過去點樣執行報告第十一章入面有關「藥物、醫療消耗品及裝備的供應」嘅建議。
物資儲備 必須點算清楚
政府口罩儲備有幾多都係市民其中一個關注點，梁繼昌問政府有冇妥善執行防疫應變計劃對口罩、藥物、醫療消耗品同裝備嘅儲備要求，要求政府審計過去三個月就有關物資嘅儲備數量。對於由懲教署製造嘅口罩都只係供應畀政府唔同部門使用，唔會推出市場，佢都問政府會點樣分派呢啲口罩同有冇適當記錄？
老實講，梁繼昌要求朱乃璋進行相關事宜嘅審計，矛頭唔單止係防疫慢幾十拍嘅食物及衞生局局長陳肇始，仲有就係搞到市民四圍撲口罩嘅財經事務及庫務局局長劉怡翔，尤其係點解民間搵口罩竟然仲多門路過政府？真係要審計清楚。
前線唔夠分 未輪到市民
劉怡翔日前講過，話政府物流服務署只有大約一千二百萬個口罩，會優先畀前線人員、衞生署嘅醫護及港口衞生人員同埋檢疫中心嘅市民同工作人員用。但試問一千二百萬個又點夠呢？佢就話已經同接近廿個國家，超過四百個供應商接洽，已經訂購咗超過四千八百萬個口罩。聽落好似好多，但佢就話有啲國家已實施咗出口管制，所以依家只有三百萬個口罩到貨。前線人員都未必夠分，有排都未輪到普通市民，睇怕又畀市民鬧爆。