中環出更：蔣麗芸棄黨內初選 無意連任立會議員
喺區議會選舉慘敗後，多個建制派已就立法會換屆選舉進行部署。據了解，民建聯喺本月三日至十八日就內部初選報名，而九龍西直選議員蔣麗芸（Ann）決定唔參加初選，唔會競逐連任。被問及日後會否以個人名義出選，佢話：「冇打算。」
阿Ann話唔競逐連任係個人意願，主要係想留番啲機會畀黨內嘅兄弟，又否認黨內有壓力要佢唔好選。佢話：「九龍西啲兄弟都好支持我，叫我繼續去選，但係我覺得要畀啲機會後生仔。」雖然唔再參選，但佢自言一定唔會退出政壇，仲話：「將來嘅事Never say never。」
周浩鼎否認棄選
雖則佢咁講，但有評論話該黨係有內部篩選同要進行整頓嘅，究竟邊個版本先係真？事實上，佢上任以嚟都相當惹火，好似近日新冠肺炎疫情嚴峻，市面一罩難求，佢就喺網上轉載咗內地電視台嘅片段，提議市民可以蒸口罩消毒，隨即遭外界狂轟，更被港大感染及傳染病中心總監何栢良炮轟影片嘅內容大錯特錯兼害死人。
另外，外界盛傳喺區議會選舉敗陣嘅周浩鼎亦唔會參與黨內初選，但佢回覆本報查詢時予以否認，又話正考慮黨內遴選機制。
卓妮