中環出更：吸取沙士經驗 何鍾泰戴埋護目鏡出街
新冠肺炎嘅疫情持續，防疫時期要經常洗手同佩戴口罩，早前有專家指佩戴眼鏡，某程度上都可減低飛沫感染嘅風險，卓妮早前喺中環見到大舜基金主席何鍾泰全副裝備咁出街，唔單止佩戴口罩保護口鼻，仲戴埋護目鏡添，話要防止細菌由眼睛傳入嘞！
何鍾泰話依家嘅新冠肺炎疫情，令佢諗番起沙士時期，大家見面都唔握手o架，反而用雙手抱拳或合十代替，減少人與人之間嘅接觸真係好重要咁話。本身係工程師嘅佢，仲提醒市民記得喺U形水管加水同漂白水防菌防毒。對於政府逐步封關，佢話封關就一定要，但封幾多？點樣封？政府就真係要積極同醫護商討喇，佢亦都明白各自有理據，所以先要商討呀，唔溝通唔對話真係做唔到事。
雷禮權行樓梯鍛煉身體
轉頭見到「九巴後人」雷禮權（William），佢就話身體不適嘅人同埋巴士車長就一定要戴口罩，因為車長每日都接載好多乘客，若果遇到帶菌者就好危險，但佢話最緊要身體健康，抵抗力強自然百毒不侵。William又分享自己嘅保健大法，話從來唔搭電梯，行樓梯順便鍛煉身體咁話。此外，佢仲話人煙稠密嘅地方就一定要避免喇，多人嘅活動盡量少去，而公司亦轉用視像會議，最重要就係勤洗手。
香港城市大學校董會主席黃嘉純亦做足防疫措施，戴口罩之餘仲佩戴咗個迷你空氣清新機。至於口罩供應方面，佢就話公司暫時都有提供，而有同事喺內地做完嘢返港，都要自行隔離o架！不過，好彩暫時啲同事都冇乜嘢事，佢仲感嘆以前都冇咁緊張，但依家啲病毒咁厲害真係小心為上。
卓妮