政情：麥潤培報讀新聞課程 自爆唔返學成日走堂
作為區議員都不時要接受採訪，沙田區議員麥潤培話為咗了解傳媒行業同記者思考方式，近幾年特意報讀新聞課程，不過佢就自爆成日「走堂」唔返學，真係壞學生喇。最弊就係佢話畢業後就定期喺小學開設「小記者培訓班」，由佢做導師。佢成日走堂唔見影，分分鐘聽少好多理論，開班教學會唔會變咗誤人子弟o架？
義務培訓小記者
麥報讀嘅新聞學銜接學位課程為期一年半，好多時啲功課都係同政治新聞有關嘅小組專題報告，佢勝在識得人多，尤其係議員方面，所以做功課對佢嚟講都無乜難度，相比起其他同學，可以話更加得心應手。佢又話，雖然成日「潛水走堂」，但如果交齊功課同考試合格，學校都會畀類似情況嘅學生畢業嘅。
至於個小記者培訓班，對象就係小四至小六學生，麥話會義務指導小學生一啲同新聞工作有關嘅知識，如採訪同溝通技巧等，一班上完堂嘅小記者反應都幾好、幾開心咁話。