政情：麥嘉晉寸政府 封關等到花謝
新冠肺炎確診個案愈爆愈多，政府早前終關閉多個關口。身兼工業貿易諮詢委員會委員嘅民主思路前聯席召集人麥嘉晉（Raymond）就批評政府封關好似擠牙膏咁，形容現時嘅情況就好似二十幾年前嘅經典歌曲《我等到花兒也謝了》咁喎。
似擠牙膏 效果有限
Raymond喺社交平台話，過去幾個星期已有不少權威驗證證明新冠肺炎傳染力強，估計確診人數幾個禮拜就會翻倍，政府應用各種手法將病毒同病患來源可能性減到最低，但政府偏偏選擇分階段封關，就好似擠牙膏咁，等到市民都可以唱《我等到花兒也謝了》喇。佢仲提到，新冠肺炎傳染力強，但政府繼續保留三個內地旅客最多嘅出入境口岸，反映政府新一輪封關政策效果非常有限。
之前政府喺記者會回應醫護罷工，話政府唔會被人威脅。Raymond就話對醫護組織罷工有保留，但佢就覺得呢個時勢唔會有人得閒用政治視角同政府討論全面封關。唔知佢係咪暗寸政府諗多咗呢？