武漢肺炎確診個案愈爆愈多，疫情好嚴峻亦未受控，兒科醫生李家仁尋日喺網上發布，話武漢肺炎已經變種成為武漢腦炎嘞！唔係啩？咁大鑊？

冇錯，李醫生真係咁講。武漢肺炎簡稱「武肺」，佢話變咗種成為武漢腦炎，簡稱係叫做「武腦」。睇到呢度，心水清嘅讀者都估到嘞！

「武腦」有乜嘢病徵？患者智商瞬間由正常跌至零，缺乏辨別是非能力，瘋狂搶購日常用品，病徵類似當年瘋狂「盲搶鹽」。嘩！直情畫公仔畫到出腸喇，「盲搶鹽」係講二○一一年日本福島核電廠大爆炸洩漏輻射，當時有傳聞話碘鹽可以防輻射，所以市民就盲搶鹽。李醫生咁講，明顯寸爆近日市民搶購廁紙同日用品。

佢仲話潛伏期係零至三小時，傳染途徑係WhatsApp。咁武腦點治療呢？佢話：「冷靜！冷靜！冷靜！」點解講咁多次？因為重要嘅嘢要講三次。

本來李醫生呢個Post寫得好有趣，都幾搞笑，但諗真啲都幾悲哀，事關市民只聽傳聞，不求真。有網友留言直指係「可悲的愚昧！」另有網友就話「家陣啲香港人真係冇腦，乜嘢都要搶餐死」。