政情：郭位派城大自家製酒精搓手液

因應武漢肺炎疫情持續，唔好話口罩喇，搓手液同漂白水都斷晒市。點算好？城大化學實驗室就自行調配咗一批酒精搓手液，郭位聯同化學系系主任李振聲教授及一眾管理層，尋日下晝巡視校園，去咗大學圖書館、楊仲儀保健中心同電算服務中心等，向前線員工派搓手液，感謝佢哋緊守崗位，繼續提供緊急同必要嘅服務。

根據世衞建議配方調製

呢批自家製酒精搓手液，係城大化學系根據世界衞生組織建議嘅配方去調製嘅，而實驗室依家努力訂製更多原材料，希望趕製更多酒精搓手液，畀更多師生可以受惠。