政情：南區裝監視鏡頭 惹私隱關注
話說有區議員指香港仔海傍道同黃竹坑道一帶加裝監視鏡頭，擔心涉私隱問題，南區區議會交通及運輸事務委員會尋日開會討論時，唔少議員質疑喺咁嘅社會情況下都仲推行，完全唔合理，但運輸署人員解極都唔到位，搞到班區議員好無奈。
運署話係市場探測器 冇得錄影
區議員袁嘉蔚話由於依家社會對政府唔信任，對鏡頭極之恐慌，擔心將來運輸署會交出有關錄影片段畀警方。運輸署交通調查及支援部工程師梁思遠回應話，有關鏡頭設於燈柱高位，屬於市場探測器，主要收集實時交通資訊提供畀市民，而考慮過私隱問題，鏡頭嘅解像度非常低，仲要冇錄影功能喎。
政府早前推出嘅智慧燈柱亦話低清拍攝，唔會侵犯私隱，但仍受到好大質疑，反修例嘅示威者仲將觀塘區嘅智慧燈柱破壞同「肢解」咗添！依家又再推加裝監視鏡頭，仲要已進行緊工程，今年第三季完成。在場議員就追問係咪咁嘅社會情況都實行？或者咩因素或咩條件下唔使用呢個鏡頭？會否諮詢街坊再實行？面對咁嘅質詢，梁只係不斷重複話會繼續解答問題，盡量解決大家疑慮，完全冇實質回答，反而令在場嘅區議員有更多疑慮。
另外，會上亦講到區內違例泊車問題，唔少議員話部分車輛更停泊在過路處影響行人視線，甚至有車輛停喺緊急車位，救護車及消防車都無法使用，仲話區內非法改裝汽車問題，直言海傍道又叫「格蘭披治」（澳門賽車比賽），聲浪非常大，促請警方加強執法。