政情：全城搶廁紙 恐慌如沙士
政府日前宣布喺聽日凌晨開始，所有經內地入境香港嘅人士都要隔離十四日，嗰晚隨即出現搶購潮，掃晒超市內嘅廁紙同日用品，清空晒啲貨架。食物及衞生局前政治助理陳智遠尋日喺Facebook（Fb）貼文，話重現咗○三年沙士搶米搶糧嗰幕，雖則當時係因愚人節有人同香港人開咗一個笑話，訛稱香港被列「疫埠」而引起，然而相隔十七年，當年爆發嗰種民怨同依家好相似。唔通係鬧政府冇吸取沙士嘅慘痛教訓？
心不安景未明惹盲搶
陳智遠喺○八年加入政府「熱廚房」之前，曾經參與智庫工作。佢喺Fb貼文，話喺○三年已開始寫時事評論，而前晚市民搶購廁紙嘅情況，令佢諗起當年沙士時亦曾出現過，嗰日係四月一日愚人節，有個人同香港人開一個玩笑，喺網上訛稱香港被列為「疫埠」，市民唔能夠離開居所，否則會遭重罰，又話明眼人當然知道呢個係惡作劇，但係當時人心惶惶，謠言一出，全城就蜂擁去超級市場搶米搶糧。
佢話當時寫咗篇文，講喺「全城中伏」嘅背後，隱含咗人心嘅不安、對前景未明嘅恐懼、社會嘅躁動，以及抑鬱情緒慢慢轉化成失望、悲情及憤怒，再昇華至史無前例嘅民怨，但係十七年過去，今次就到全港一罩難求，之後謠言滿天飛，全城就瘋狂搜刮廁紙，連M巾安全套都唔放過，之後大家大概會好似當年「疫埠」謠言一樣，對呢種莫名其妙嘅事一笑置之，但係現今社會嗰份躁動，太似曾相識嘞！
唧牙膏防疫 市民躁動
老實講，外界炮轟包括食衞局局長陳肇始在內嘅政府高官，喺防疫工作慢幾十拍，就連最基本嘅口罩供應都做唔到，搞到要市民四周圍撲，政府就話全球採購有困難，但有啲人就有貨周街賣，仲任由佢哋抬價同炒賣，市民梗係嬲爆喇！
好似前晚出現搶購潮咁，政府又係慢半拍先喺官網澄清，話貨運會維持不變，而從事物資同食品往來兩地嘅人士唔需要隔離。政府推出防疫措施好似唧牙膏咁，更加令人心不穩，陳智遠講話嗰份躁動似曾相識，其實都算講得好含蓄，相信佢警告緊政府，防疫做得咁差，民怨好快大爆發。班政府高官收唔收到？知唔知碇呀？