中環出更：被指冇支援區會 民政專員激動反駁
最近武漢肺炎疫情大爆發，唔少打工仔都要在家工作，公務員都唔例外。但正正因為公務員在家工作，所以有部分區議會秘書處職員無法去區議會協助開會，中西區區議員甘乃威唔止就事件提動議，仲鬧爆秘書處荒謬，質疑佢哋係咪連返區議會開門都驚有肺炎。
話要保障同事 講到耳仔紅晒
話說有多個區議會就防疫召開特別會議，因公務員要在家工作未能提供支援，導致有區議會要淪落街頭，甚至開「山寨」會議。中西區區議會尋日亦開特別會議，雖然區議會秘書處有出席，但民主派依然提動議，炮轟政府要區議員喺走廊開會係侮辱，其中甘乃威提到《區議會條例》寫明由區議員界定秘書職責，點解叫秘書開門都唔肯，質疑係邊個決定，仲直斥「垃圾」。另一區議員許智峯就希望民政專員（DO）承諾，唔好因疫情而提供唔到服務，仲認為咁樣就係疏忽職守。
中西區DO黃何詠詩都解釋話唔係中西區區議會開唔到會，而其他當區嘅DO亦有解釋過原因。後來佢再回應時就話秘書處同樣係公務員，作為政府要盡量帶頭減低風險。佢重申尊重議會，唔會破壞議會制度，仲話有緊急情況就會出席會議，做到嘅一定會做，但自己作為部門之首都要保障秘書處同事嘅健康。佢回應時仲愈講愈激動，耳仔都紅埋添，唔通係覺得太委屈？
卓妮