中環出更：應對疫情馬清楠叫做多啲運動
全球多個地方都有武漢肺炎嘅確診個案，究竟邊度先安全呢？保良局早前搞咗個首映禮，好多核心成員都有出席撐場，唔知佢哋對肺炎擔唔擔心，又有乜嘢方法預防呢？
面對疫情擴散，全港學校延後至三月初先上課，保良局主席馬清楠話早就吩咐保良局旗下學校嘅校長要做好衞生工作，呼籲學生返學前量體溫，如果發燒就唔好返學喇！一向習慣做運動同打網球嘅佢，仲話最緊要都係做多啲運動，勤洗手，睡眠充足，保持身體健康，先可以對抗病毒。
轉頭見到總理顧東華同湯振傑，顧東華話農曆新年去泰國玩兼探朋友，對於泰國都出現武漢肺炎感染個案，佢話唔擔心，事關佢唔會去街市同醫院呢啲高危地方，佢仲話好多人病，都係因為無做運動嘅習慣，由於做運動可以增強免疫力，所以多做運動對身體一定好，兼且出咗一身汗，人都舒服好多o架！
保良局副主席陳正欣就認為香港人吸取當年沙士嘅教訓後，應該比全世界大部分地區嘅人對預防傳染病有更強嘅意識，再加上依家媒體消息流通，市民可以好快就知道要點樣做好衞生工作，佢呼籲市民要做足防禦措施，唔好掉以輕心。
中港兩邊走 金鈴勤洗手
「金槌拍賣官」金鈴都在場，佢不時要香港同內地兩邊走，提到內地感染武漢肺炎嘅確診個案急速上升，而香港相關嘅確診個案亦愈嚟愈多，佢話好留意疫情嘅消息，而最近都唔會去人多嘅地方嘞，自己同家人亦會做足防禦措施，例如出街必定會戴口罩，亦會勤啲洗手。
卓妮