政情：敗選後獲任命大嶼山發展委員 周浩鼎傅曉琳 死撐非安慰獎
政府尋日宣布委任大嶼山發展諮詢委員會八位新成員，任期為期兩年，今個月起生效。喺今屆區議會選舉中敗選、無法連任離島區議員嘅傅曉琳（Sammi）同周浩鼎（Holden），都係新委員之一，Sammi話完全唔覺任命係落選區會嘅「安慰獎」，又話自己早就係公民教育委員會嘅委員，所以並唔存在「安慰獎」呢個講法。
Sammi話農曆新年假期前已接到通知，得悉將會出任委員一職，估計獲委任主要係同過往熟悉離島區地區事務，加上對上一屆亦都係當區區議員嘅原因有關。
義務性質 一年開兩次會
佢話工作係義務性質，一年只係開兩次會，對佢專注地區工作無乜大問題，又認為喺呢個新崗位亦可以繼續為居民發聲。
喪失「雙料議員」資格嘅Holden同樣唔認同任命係「安慰獎」，反而仲好歡迎政府呢次任命，希望可以喺嚟緊嘅時間為大嶼山發展出謀獻策。
其他新成員包括旅遊發展局總幹事程鼎一、香港建築師學會前會長陳沐文、香港測量師學會前會長劉振江、離島區議會副主席兼當然議員黃文漢，以及科技大學極智慧城市中心主任羅康錦教授等人。