政情：小販竄鄰區逃避檢控 莫灝哲轟食署執法僵化
武漢肺炎襲港，更恐有社區爆發風險，政府防疫不力屢受批評。黃大仙區議會尋日再就肺炎疫情舉行特別會議，唔少議員關心區內清潔情況，其中莫灝哲就大鬧食物及環境衞生署辦事不力。
街市搓手液機淪裝飾
莫指日前同食環署幫辦（衞生督察）巡視牛池灣街市時，發現「周圍都有酒精搓手液嗰部機，不過就係冇酒精搓手液」，又話不論檔主定顧客都好需要呢啲消毒液，敦促署方要做好呢啲硬件嘢。佢又提到小販問題喺彩虹一帶非常嚴重，原因係食環署執法僵化，指該街市天橋處於兩區交界，署方執法時小販會跑到鄰區逃避檢控，批評「差兩三步就放走佢，咁佢咪去第二度再賣過囉！」佢同時關注有人喺署方管轄範圍販賣來歷不明口罩。
食環署黃大仙區環境衞生總監梁志明回應，指署方已要求承辦商補充消毒液，又提到近日已加強檢控吐痰同亂扔垃圾者。佢又話會同觀塘區小販管理隊互相配合，喺天橋兩邊夾擊，等小販冇得走。至於有人喺街上出售口罩嘅問題，佢話署方會加強巡邏，一旦發現必定會檢控同充公相關貨物。