政情：提早開大會被拒 泛民拋波畀蔣麗芸
武漢肺炎疫情擴散，政府早前宣布延長公務員在家工作嘅安排至本月九日，立法會秘書處亦同樣跟隨，但泛民全體議員就話要盡快討論抗疫措施，要求提前喺今日召開大會，雖然主席梁君彥已否決咗有關提議，但泛民就將個波拋咗畀衞生事務委員會主席蔣麗芸（Ann），要佢一周開一會，阿Ann話嚟緊十四日先開到會，至於會否一周一會就要等政府覆咗先知。
梁君彥話如果短期內開大會，會有至少過百人聚集，包括議員、官員、提供必要支援嘅人員同傳媒喺大樓聚集，恐怕會增加疫情擴散嘅風險，所以喺關鍵時刻不宜提前開會喎。
要求一周一會 監察防疫
泛民議員見大會開唔成，就轉移搵阿Ann加開衞生事務委員會，又批評政府由叫旅客填健康申報表、供應口罩，同埋封關等措施都錯失先機，所以希望定期安排每周一次嘅特別會議監察防疫措施喎，但阿Ann話要下星期五，即過咗原定十二日嘅大會後先開到事務委員會，又話已去信秘書處，睇吓如果一周一會，政府會唔會安排到相關官員出席，但目前就仲未有答覆。
另外，泛民尋日又去信梁君彥，要求交代大樓嘅防疫措施，仲話想盡早喺議會商議抗疫防疫事宜，擺明又係想提早開大會喇！