政情：肥彭又回魂嗌政改 被批沉迷殖民夢幻

肥彭日前喺英國倫敦出席Hong Kong Watch（香港監察）活動時，促請港府成立獨立調查委員會，調查持續多個月嘅示威原因、示威者同警方雙方嘅行為，並且希望港府喺北京鼓勵下，同香港政黨及公民社會進行無預設前提嘅政改對話，商討啟動程序，令香港落實北京喺九七年前後所作出嘅普選承諾。

當自己仲係港督 不停指手畫腳

外交部駐港特派員公署就肥彭發表有關要求港府成立獨立調查委員會，同埋不設條件開啟政改對話嘅言論表示堅決反對，公署要求肥彭擺正位置，尊重事實，立即停止以任何理由干預香港事務。

公署發言人仲話香港事務喺回歸後純屬中國內政，唔容許任何外部勢力指手畫腳，跟住話香港回歸逾二十年，肥彭依然沉迷喺殖民主義嘅夢幻不醒，動輒對香港事務說三道四、指手畫腳，企圖與歷史、事實與正義作對，歇斯底里，不自量力上演反中亂港嘅戲碼，遭到包括香港同胞在內嘅全體中國人民嘅譴責同唾棄，促請肥彭立即停止殖民主義嘅白日夢。

老實講，香港因反修例爆發激烈嘅衝突持續近八個月，至今仍未平息，喺呢啲衝突或示威期間，經常見到示威者高舉港英旗，被指係「戀殖」。而喺過去一段日子，肥彭回魂嘅次數就更加頻密，直情當正自己仲係香港嘅港督咁，對港府不停指手畫腳，仲教埋港府應該點做添！

政治光環殆盡 冇人理刷存在感

肥彭喺香港反修例風波期間，亦多次接受外國傳媒訪問評論香港嘅情況，雖然佢再三強調自己譴責示威者行使暴力，但又話理解示威者採取暴力嘅原因，因無人願意同示威者對話，亦冇人真正理解示威者合理嘅擔憂。

當時有時事評論員批評肥彭顛三倒四，唔單止企圖將責任推給港府，更加係火上加油，畀籌碼示威者更肆意搗亂香港，又批評肥彭嘅政治光環已經殆盡，根本冇人理，所以不停對港事務指手畫腳嚟刷存在感。