中環出更：林威強：失明者亦嚮往理想身材
好多人勤做運動，目的係追求良好嘅體魄同身材線條。香港失明人健體會董事會主席林威強話儘管失明人士唔會照鏡，但若果覺得衣帶漸寬而又有人同佢講「你清減咗喎」，欣喜之情亦會油然而生，可見就算睇唔到身形變化，失明人士都嚮往理想嘅身材。
現職體育教師嘅林威強話，失明人士喺義務領跑員引領下投身長跑運動，無論身心皆有明顯改善，令佢深感欣慰。佢話有失明男士參加長跑訓練後，即戒除吸煙嗜酒嘅陋習，亦有視障少女喺長跑活動中搵到自信，投身職場一改隱匿幽閉嘅生活。
林威強成立嘅義工團體不但吸引逾七百位跑手加入擔任領跑員，早前更獲得義務工作發展局頒發獎項予以表揚。同場仲見到菁英會副秘書長高松傑、香港傷殘青年協會主席吳家榮同香港輪椅武術總會主席李安東。
鍾晞浚以車胎卡板製治療遊樂場
以炮製「手作遊樂場」著稱嘅Mission Until Dawn，係另一個得到褒獎嘅義工團體。創辦人兼主席鍾晞浚話時下嘅小朋友，唔係要應付沉重嘅功課，就係沉迷喺電子遊戲，成長期間嘅小朋友為免發展遲緩，就應該多到戶外享受實體玩樂，而佢就同具物理治療同工程背景嘅義工，運用車胎同卡板等物料製作具治療性質嘅遊樂設施，提升小朋友嘅感覺統合同肌肉協調。
從事物理治療嘅傑青吳俊霆，就因為多年來為病人組織提供義工服務而得獎。中學時期嘅佢因按愛丁堡獎勵計劃嘅要求，經常到醫院做義工，目睹好多病人痊愈之後，亦要面對漫長嘅復康過程，從而驅使佢立志成為物理治療師。佢話義工服務不但助人，仲有助確立自己嘅人生路向。
卓妮